Jagah Ji Laganey Ki Dunya Nahi'n Hai Lyrics - Urdu

 

جگہ جی لگانےکی دنیا نہیں ہے

یہ عبرت کی جا ہے تماشا نہیں ہے

ملے خاک میں اہلِ شاں کیسےکیسے

مکیں ہو گئے لامکاں کیسے کیسے

ہُوئے نامور بے نشاں کیسے کیسے

زمیں کھا گئی نوجواں کیسے کیسے

اجل نےنہ کِسریٰ ہی چھوڑا نہ دارا

اسی سے سکندر سا فاتح بھی ہارا

ہر اک لےکے کیا کیا نہ حسرت سدھارا

پڑا رہ گیا سب یونہی ٹھاٹ سارا

بڑھاپے سے پاکر پیامِ قضا بھی

نہ چونکانہ چہتا نہ سنبھلا ذرا بھی

کوئی تیری غفلت کی ہے انتہا بھی

جُنوں کب تلک ہوش میں اپنے آ بھی

تجھے پہلے بچپن میں برسوں کِھلایا

جوانی نے پھر تجھ کو مجنوں بنایا

بڑھاپے نے پھر آ کے کیا کیا ستایا

اجل تیرا کردے گی بالکل صفایا

یہی تجھ کو دُھن ہےرہوں سب سے بالا

ہوں زینت نرالی ہو فیشن نرالا

جیا کرتا ہے کیایونہی مرنے والا

تجھے حُسنِ ظاہر نے دھوکے میں ڈالا

وہ ہے عیش و عشرت کا کوئی محل بھی

جہاں تاک میں ہر گھڑی ہو اجل بھی

بس اب اپنے اس جہل سےتُو نکل بھی

یہ طرزِ معیشت اب اپنا بدل بھی

یہ دنیائے فانی ہے محبوب تجھکو

ہُوئی آہ کیا چیز مرغوب تجھکو

کیا ہائے شیطاں نے مغلوب تجھکو

سمجھ لینااب چاہیے خوب تجھکو

نہ دلداداءِشہر کوئی رہے گا

نہ گرویدۂ شُہرا جوئی رہے گا

نہ کوئی رہا ہے نہ کوئی رہے گا

رہے گا تو ذکرِ نِکوئی رہے گا

جب اس بزم سے اٹھ گئے دوست اکثر

اور اٹھتے چلے جا رہے ہیں برابر

یہ ہر وقت پیشِ نظرجب ہے منظر

یہاں پر تیرا جی بہلتا ہے کیوں کر

شاعر: خواجہ عزیزالحسن مجذوبؒ