Mustafa Jan e Rehmat Pe Lakhon Salam Complete Lyrics - Urdu Salam

 

مصطفی جانِ رحمت پہ لاکھوں سلام

شمعِ بزمِ ہدایت پہ لاکھوں سلام

مِہرِ چَرخِ نبوت پہ روشن دُرود

گُلِ باغِ رسالت پہ لاکھوں سلام

شہریارِ اِرَم تاجدارِ حرم

نَو بہارِ شفاعت پہ لاکھوں سلام

شبِ اسریٰ کے دولہاپہ دائم درود

نَوشۂ بزمِ جنت پہ لاکھوں سلام

عرش کی زیب و زینت پہ عرشی درود

فرش کی طِیب و نُزہت پہ لاکھوں سلام

نورِ عینِ لطافت پہ الطَف درود

زیب و زینِ نظافت پہ لاکھوں سلام

سروِنازِ قِدم مغزِ رازِ حِکم

یکّہ تازِ فضیلت پہ لاکھوں سلام

نقطۂ سِرِّ وحدت پہ یکتا درود

مرکزِ دورِ کثرت پہ لاکھوں سلام

صاحبِ رَجعتِ شمس و شَقُ القمر

نائبِ دستِ قدرت پہ لاکھوں سلام

جس کے زیرِ لِوا آدم و من سِوا

اس سزائےسیادت پہ لاکھوں سلام

عرش تا فرش ہے جس کے زیرِ نگیں

اس کی قاہِر ریاست پہ لاکھوں سلام

اصلِ ہربُود و بہبُود تخمِ وُجُود

قاسمِ کنزِ نعمت پہ لاکھوں سلام

فتحِ بابِ نبوت پہ بے حد درود

ختمِ دورِ رسالت پہ لاکھوں سلام

شَرقِ انوارِقدرت پہ نوری درود

فَتقِ اَزہارِ قُربت پہ لاکھوں سلام

بے سہِیم و قسِیم و عدیل و مثِیل

جوہرِ فردِ عزّت پہ لاکھوں سلام

سِرِّغیبِ ہدایت پہ غیبی درود

عطرِ جَیبِ نہایت پہ لاکھوں سلام

 

ماہِ لاہوتِ خلوت پہ لاکھوں درود

شاہِ ناسُوتِ جلوت پہ لاکھوں سلام

کنزِ ہر بے کس و بے نوا پر درود

حِرزِ ہر رفتہ طاقت پہ لاکھوں سلام

پرتَوِ اسمِ ذاتِ اَحد پر درود

نسخۂ جامِعِیَّت پہ لاکھوں سلام

مطلعِ ہر سعادت پہ اَسعد درود

مقطعِ ہر سِیادت پہ لاکھوں سلام

خلق کے داد رَس سب کے فریاد رَس

کہفِ روزِ مصیبت پہ لاکھوں سلام

مجھ سے بے کس کی دولت پہ لاکھوں درود

مجھ سے بے بس کی قوت پہ لاکھوں سلام

شمعِ بزمِ دَنیٰ ھُو میں گُم کُن اَنا

شرحِ متنِ ہُوِیَّت پہ لاکھوں سلام

انتہائے دوئی ابتدائے یَکی

جمعِ تفریق و کثرت پہ لاکھوں سلام

کثرتِ بعدِ قِلّت پہ اکثر درود

عزّتِ بعدِ ذِلّت پہ لاکھوں سلام

ربِّ اعلیٰ کی نعمت پہ اعلیٰ درود

حق تعالیٰ کی مِنّت پہ لاکھوں سلام

ہم غریبوں کے آقاپہ بے حد درود

ہم فقیروں کی ثَروَت پہ لاکھوں سلام

فرحتِ جانِ مومن پہ بے حد درود

غَیظِ قلبِ ضَلالت پہ لاکھوں سلام

سببِ ہر سبب مُنتَہائےطَلَب

عِلَّتِ جُملہ عِلت پہ لاکھوں سلام

جس کے جلوے سے مرجھائی کلیاں کِھلیں

اس گلِ پاک منبت پہ لاکھوں سلام

جس کے ماتھے شفاعت کاسہرا رہا

اس جبینِ سعادت پہ لاکھوں سلام

جس کے سجدے کو محرابِ کعبہ جھکی

ان بھوؤں کی لطافت پہ لاکھوں سلام

جس طرف اٹھ گئی دم میں دم آگیا

اس نگاہِ عنایت پہ لاکھوں سلام

جس سے تاریک دل جگمگانے لگے

اس چمک والی رنگت پہ لاکھوں سلام

پتلی پتلی گلِ قدس کی پتیاں

ان لبوں کی نزاکت پہ لاکھوں سلام

جس سے کھاری کنویں شیرۂ جاں بنے

اس زُلالِ حلاوت پہ لاکھوں سلام

وہ زباں جس کو سب کُن کی کنجی کہیں

اس کی نافذ حکومت پہ لاکھوں سلام

جس کے گچھے سے لچھے جھڑیں نور کے

ان ستاروں کی نزہت پہ لاکھوں سلام

جس کی تسکیں سے روتے ہوئے ہنس پڑیں

 اس تبسم کی عادت پہ لاکھوں سلام

ہاتھ جس سمت اٹھا، غنی کر دیا

موجِ بحرِ سماحت پہ لاکھوں سلام

جس کو بارِ دوعالم کی پرواہ نہیں

ایسے بازو کی قوت پہ لاکھوں سلام

دل سمجھ سے ورا ہے مگر یوں کہوں

غنچۂ رازِ وحدت پہ لاکھوں سلام

کُل جاں مِلک اور جَو کی روٹی غذا

اس شکم کی قناعت پہ لاکھوں سلام

جو کہ عزمِ شفاعت پہ کھنچ کر بندھی

اس کمر کی حمایت پہ لاکھوں سلام

انبیاء تَہ کریں زانو ان کے حضور

زانوؤں کی وجاہت پہ لاکھوں سلام

کھائی قرآں نے خاکِ گزر کی قسم

اس کفِ پا کی حرمت پہ لاکھوں سلام

جس سہانی گھڑی چمکا طیبہ کا چاند

اس دل افروز ساعت پہ لاکھوں سلام

جس کے گھیرے میں ہیں انبیاء و  مَلک

اس جہانگیر بعثت پہ لاکھوں سلام

اندھے شیشے جھلا جھل دمکنے لگے

جلوہ ریزئ دعوت پہ لاکھوں سلام

جس کے آگے کھچی گردنیں جھک گئیں

اس خدا داد شوکت پہ لاکھوں سلام

کس کو دیکھا یہ موسیٰ سے پوچھے کوئی

آنکھ والوں کی ہمت پہ لاکھوں سلام

آبِ تطہیر سے جس میں پودے جمے

اس ریاضِ نجابت پہ لاکھوں سلام

خونِ خیر الرسل سےہےجن کا خمیر

ان کی بے لوث طینت پہ لاکھوں سلام

جس کاآنچل نہ دیکھا مہ ومہر نے

اس ردائے نزاہت پہ لاکھوں سلام

اوجِ مہرِ ہدیٰ موجِ بحرِ ندیٰ

روحِ روحِ سخاوت پہ لاکھوں سلام

عرش سے جس پہ تسلیم نازل ہوئی

اس سرائے سلامت پہ لاکھوں سلام

جن میں روح القدس بے اجازت نہ جائیں

اس سرادق کی عظمت پہ لاکھوں سلام

وہ دسوں جن کو جنت کا مژدہ ملا

اس مبارک جماعت پہ لاکھوں سلام

سایۂ مصطفی مایۂ اصطفیٰ

عز و نازِ خلافت پہ لاکھوں سلام

جس مسلماں نے دیکھا انہیں اک نظر

اس نظر کی بصارت پہ لاکھوں سلام

کاملانِ طریقت پہ کامل دُرود

حاملانِ شریعت پہ لاکھوں سلام

بے عذاب و عتاب و حساب و کتاب

تا ابد اہلِ سنت پہ لاکھوں سلام

ایک میرا ہی رحمت پہ دعویٰ نہیں

شاہ کی ساری امت پہ لاکھوں سلام

مجھ سے خدمت کے قدسی کہیں ہاں رضاؔ

مصطفی جانِ رحمت پہ لاکھوں سلام

شاعر: امام احمد رضا خان بریلویؒ