Teri Ik Chashm e Rehmat Se Lyrics - Urdu

 

 

تیری اک چشم رحمت سے تیرا بیمار بہتر ہے

ہزاروں طبی نسخوں سے نگاہِ یار بہتر ہے

شہنشاہی سے بڑھ کر ہے تیری پاپوش برداری

سکندر سے تیرا اک خادمِ دربار بہتر ہے

جگہ مل جائے گر پاپوش گاہِ یار میں مجھکو

خوشا یہ مَسنَدِ طاؤُس سے صد بار بہتر ہے

تیرے لہجے کا زیرو بم ہے دلکش آبشاروں سے

گلستاں سے تیری گفتارکا گلزار بہتر ہے

دیا ہے حُسنِ کُل نے حُسن ایسا تیری صورت کو

کہ دیدِ حُسنِ یوسفؑ سے تیرا دیدار بہتر ہے

مقام و مرتبہ ساری خدائی سے میرے آقاؐ

تیرا اِس پار بہتر ہے تیرا اُس پار بہتر ہے

میرے آقاؐ سے خوشبو خُلد کی یوں عرض کرتی ہے

ہر اک خوشبو سے تیرے جسم کی مہکار بہتر ہے

تیرے شیریں دَہَن سے پھول جَھڑتے ہیں فَصاحت کے

جنہیں چُن کر فَصاحت کا ہوامعیار بہتر ہے

حبیبِ کبریاؐ کے عشق کو دل میں مکیں کرلے

مقدر عالمیں میں گر تجھے درکار بہتر ہے

کھلا ہے اَیُّکُم مِثلِی سے یہ عُقدہ ندیمؔ اختر

ہر اک بہتر سے ذاتِ حق کا وہ شہکار بہتر ہے

شاعر: پیرزادہ محمد ندیم اخترندیمؔ حنفی القادری المنگانوی