کی کی نہ کیتا یارنے اک یار واسطے
رب محفلاں سجائیاں نیں سرکار ﷺ واسطے
دل یاد لئی بنایا اے تعریف لئی زباں
اکھیاں بنائیاں سوہنے دے دیدار واسطے
کئیاں نوں روز ہوندے نیں دیدار آپ ﷺ دے
کئی تڑپدے نیں سوہنے دے دیدار واسطے
صدقہ نبی دی آل دا بخشے خدا شفا
منگو دعاواں میرے جئے بیمار واسطے
رحمت اوہدی نے لَے لیا اپنی پناہ وچ
پائے جدوں میں سوہنے نوں دوچار واسطے
اللہ نے فرشاں عرشاں تے لائیاں جو رونقاں
کھیڈاں رچائیاں سوہنے دے سب پیار واسطے
سَد لَے مدینے والیا اونہاں نوں ہُن تے کول
عرضاں جنہاں نیں کیتیاں دربار واسطے
لنگھ گئی حیاتی ساڈی تے عرضاں کریندیاں
پئے تڑپدے آں سوہنے دے دیدار واسطے
گزرے نیازیؔ زندگی سوہنے دے عشق وچ
نعتاں میں پڑھدا راں مٹھے منٹھار واسطے
شاعر: عبدالستار نیازیؔ
No comments:
Post a Comment