سیّد نے کربلا میں وعدے نبھا دیے ہیں
دینِ محمدی کے گلشن کِھلا دیے ہیں
بولے حسینؓ مولا تیری رضا کی خاطر
ایک ایک کرکے میں نے ہیرے لُٹا دیے ہیں
دینِ نبیؐ پہ واری اکبرؓ نے بھی جوانی
عباسؓ نے بھی اپنے بازو کٹا دیے ہیں
زینبؓ کے باغ میں بھی دو پھول تھے مہکتے
زینبؓ نے وہ بھی دونوں راہِ خدا دیے ہیں
زہرہؓ کے ناز پالے پھولوں پہ سونے والے
کربلا کی خاک میں وہ ہیرے رلا دیے ہیں
بخشش ہے اُس کی لازم سیّد کے غم میں حافظؔ
دو چار آنسو روکر جس نے بہا دیے ہیں
No comments:
Post a Comment