نعت رسول مقبولؐ
تُو جو اللہ کا محبوب ہوا خوب ہوا
یانبیؐ خوب ہوا خوب ہوا خوب ہوا
شبؐ معراج یہ کہتے تھے بَہَم
سُخنِ طالب و مطلوب ہوا خوب ہوا
اے شہنشاہِ رُسل فخرِ رُسل ختمِ رُسل
خوب سے خوب خوش اُسلوب ہوا خوب ہوا
حشر میں اُمتِ عاصی کا ٹھکانا ہی نہ تھا
بخشوانا تجھے مرغوب ہوا خوب ہوا
حُسنِ یوسف میں تِرا نُور تھا اے نُورِ خدا
چارہءِ دِیدہءِ یعقوبؑ ہوا خوب ہوا
تھی سبھی پیشِ نظر معرکہ ءِ کَرب وبَلا
صبر میں ثانیءِ ایوب ہوا خوب ہوا
فخر آدمؑ کو نہ ہوتا جو فرشتہ ہوتا
بنی آدم سے جو منسوب ہوا خوب ہوا
داغ ہے روزِ قیامت مری شرم اُس کے ہاتھ
میں گناہوں سے جو محجوب ہوا خوب ہوا
شاعر: داغ دہلویؔ
معانی
بَہَم : مجتمع،یکجا،ملےہوئے،ایک دوسرے کے ساتھ
مَحجُوب : جو حجاب میں ہو،مخفی،پنہاں،چھپا ہوا،پردے میں
No comments:
Post a Comment