Koi Saleeqa Hai Arzoo Ka - Yeh Sab Tumhara Karam Hai Aaqa Lyrics - Urdu

 

 کوئی سلیقہ ہے آرزو کا نہ بندگی میری بندگی ہے

یہ سب تمہارا کرم ہے آقاؐ کہ بات اب تک بنی ہوئی ہے

کسی کا احسان کیوں اٹھائیں کسی کو حالات کیوں بتائیں

تمہی سے مانگیں گے تم ہی دو گے تمہارے در سے ہی لَو لگی ہے

تجلیوں کے کفیل تم ہومرادِ قلبِ خلیلؑ تم ہو

خدا کی روشن دلیل تم ہویہ سب تمہاری ہی روشنی ہے

تمہی ہو روحِ روانِ ہستی سکوں نظر کا دلوں کی مستی

ہے دوجہاں کی بہار تم سےتمہی سے پھولوں میں تازگی ہے

شعور و فکر و نظر کے دعوے حدِ تعیّن سے بڑھ نہ پائے

نہ چُھو سکے اُن بلندیوں کو جہاں مقام محمدیؐ ہے

نظر نظر رحمتِ سراپا ادا ادا غیرتِ مسیحا

ضمیر مردہ بھی جی اٹھے ہیں جدھر تمہاری نظر اٹھی ہے

عمل کی میرے اساس کیا ہےبجُز ندامت کے پاس کیا ہے

رہے سلامت تمہاری نسبت میرا تو اک آسرا یہی ہے

عطا کیا مجھکو دردِ الفت کہاں تھی یہ پُر خطا کی قسمت

میں اس کرم کے کہاں تھا قابل حضورؐ کی بندہ پروری ہے

انہی کے در سے خدا ملا ہے انہی سے اس کا پتہ چلا ہے

وہ آئینہ جو خدا نُما ہے جمالِ حُسنِ حضورؐ ہی ہے

بشیر کہیئے نذیر کہیئےاُنہیں سراجِ مُنیر کہیئے

جو سَر بَسر ہے کلامِ ربیّ وہ میرے آقاؐ کی زندگی ہے

ثنائے محبوبِ حق کے قرباں سرورِ جاں کا یہی ہے عنواں

ہرایک مستی فنا بداماں یہ کیف ہی کیفِ سرمدی ہے

ہم اپنے اعمال جانتے ہیں ہم اپنی نسبت سے کچھ نہیں ہیں

تمہارے در کی عظیم نسبت متاعِ عظمت بنی ہوئی ہے

یہی ہے خالدؔ اساسِ رحمت یہی ہے خالدؔ بِنائے عظمت

نبیؐ کا عرفان زندگی ہے نبیؐ کا عرفان بندگی ہے

شاعر: خالد محمود خالد نقشبندیؔ