کھینچ لایا ہے مجھے جذبِ فراوانِ فریدؒ
لِلّہ الحمدہوا آج میں مہمانِ فریدؒ
کیوں نہ پلکوں سے چُنوں خارِ بیابانِ فریدؒ
میں ازل ہی سے ہوں سرگشتہ وحیرانِ فریدؒ
تختِ جمشید کو کیا خاک نظر میں لائیں
خسروِ ملکِ وِلایت ہیں غلامانِ فریدؒ
اِن کو جلووں سے ہوئی جاتی ہیں آنکھیں خِیرہ
مثلِ خورشید ہیں ذاتِ بیابانِ فریدؒ
میں نے اک عشق کو دیکھا ہے بہ شکلِ صابرؒ
میں نے اک حُسن کو پایا ہے بہ عنوانِ فریدؒ
دل میں کچھ خوف نہ آشوبِ قیامت کا رہے
ہاتھ آجائے اگر گوشۂ دامانِ فریدؒ
فائزِ جلوۂ خاصانِ خدا ہُوں مظہرؔ
دل ہے صابرؒ پہ فدا،جان ہے قربانِ فریدؒ
شاعر: حافظ مظہر الدین مظہرؒ
No comments:
Post a Comment