منقبت حضرت عثمان غنی
اللہ اللہ یہ تھی سیرتِ عثمانِ غنی
دین پر صرف ہوئی دولتِ عثمانِ غنی
رفتہ رفتہ وہ بڑھی عظمتِ عثمانِ غنی
دونوں عالم میں ہوئی شہرتِ عثمانِ غنی
اک ذرا بیعتِ رضواں کی بھی تفسیر پڑھو
بیعت اللہ کی ہے ،بیعتِ عثمانِ غنی
کرم خالقِ کونین رہا شاملِ حال
قابل رشک بنی قسمتِ عثمانِ غنی
ہر نفس شانِ حیا ،مصدرو میزانِ حیا
زندگی بھر یہ رہی فطرتِ عثمانِ غنی
آپ نے جامع قرآں کا لقب پایا ہے
دین و دنیا میں بڑھی عظمتِ عثمانِ غنی
عشقِ اللہ و رسولؐ آپ کو مل جائے گا
دل میں پیدا تو کریں الفتِ عثمانِ غنی
سطوت و عظمت ِاسلام تھی اُن کے دم سے
شان اسلام کی تھی شوکتِ عثمانِ غنی
وہ صحابی تھے ،مجاہد تھے،خلیفہ تھے نصیرؔ
نازِ اسلام بنے حضرتِ عثمانِ غنی
شاعر: پیر سید نصیرالدین نصیرؒ
No comments:
Post a Comment