Mar K Apni Hi Adaon Pe Amar Ho Jau'n Lyrics - Urdu

 

مر کے اپنی ہی اداؤں پہ امر ہو جاؤں

اُن کی دہلیز کے قابل میں اگر ہو جاؤں

 

اُن کی راہوں پہ مجھے اتنا چلانا یاربّ

کہ سفر کرتے ہوئے گردِ سفر ہو جاؤں

زندگی نے تو سمندر میں مجھے پھینک دیا

اپنی مٹھی میں وہ لے لیں تو گُہر ہو جاؤں

میرا محبوب ہے وہ رہبرِ کون و مکاں

جس کی آہٹ بھی میں سن لُوں تو خضر ہو جاؤں

اس قدر عشقِ نبیؐ ہو کہ مٹا دوں خود کو

اس قدر خوفِ خدا ہو کہ نڈر ہو جاؤں

ضرب دُوں خود کو جو اُن سے تو لگُوں لاتعداد

وہ جو مجھ میں سے نکل جائیں صفر ہو جاؤں

آرزو اب تو مظفر جو کوئی ہے تو یہ ہے

جتنا باقی ہُوں مدینے میں بسر ہو جاؤں

شاعر: مظفر وارثی