عجب رنگ پر ہے بہارِ مدینہ
کہ سب جنتیں ہیں نثارِ مدینہ
مبارک رہے عندلیبو تمہیں گُل
ہمیں گُل سے بہتر ہیں خارِ مدینہ
بنا شَہ نشیں خسروِ دوجہاں کا
بَیاں کیا ہو عِزّ و وقارِ مدینہ
میری خاک یاربّ نہ برباد جائے
پسِ مرگ کردے غُبارِ مدینہ
کبھی تو مَعاصی کے خِرمن میں یاربّ
لگے آتشِ لالہ زارِ مدینہ
رگِ گُل کی جب نازُکی دیکھتا ہُوں
مجھے یاد آتے ہیں خارِ مدینہ
مَلائک لگاتے ہیں آنکھوں میں اپنی
شب و روز خاکِ مزارِ مدینہ
جِدھر دیکھیے باغِ جنت کِھلا ہے
نظر میں ہیں نقش و نگارِ مدینہ
رہیں اُن کے جلوے بسیں اُن کے جلوے
میرا دل بنے یادگارِ مدینہ
حرم ہے اسےساحتِ ہردوعالم
جو دل ہوچکا ہے شکارِ مدینہ
دوعالم میں بٹتا ہے صدقہ یہاں کا
ہمِیں اک نہیں ریزہ خوارِ مدینہ
بنا آسماں منزلِ ابنِ مریم
گئے لامکاں تاجدارِ مدینہ
مُرادِ دلِ بُلبلِ بے نوا دے
خدایا دِکھا دے بہارِ مدینہ
شَرف جن سے حاصل ہوا انبیاء کو
وہی ہیں حسنؔ افتخارِ مدینہ
شاعر: حضرت علامہ مولانا حسن رضا خان رحمتہ اللہ علیہ
No comments:
Post a Comment