Jis Jagah Ahmad e Mukhtar Ka Naam Aata Hai Lyrics - Urdu

 

کلام

جس جگہ احمدِ مختارؐ کا نام آتا ہے

وہیں جبریلِ امیں لے کے سلام آتا ہے

عشقِ خواجہؐ میں اک ایسا بھی مقام آتا ہے

دل دھڑکتا ہے تو رحمت کا پیام آتا ہے

جگمگا اٹھتے ہیں انوار سے میرے شب و روز

یاد جب اُن کا مجھے حُسنِ تمام آتا ہے

آپؐ کے حکم سے بے پر کو ملی ہے پرواز

اِذن بخشا ہے توسرکارؐ غلام آتا ہے

دلِ بے تاب ٹھہر، اے دلِ بے تاب ٹھہر

باادب باش کہ طیبہ کا مقام آتا ہے

وقتِ پیری تب و تابِ جوانی لوٹ آئے

ساعتِ سجدہ و ہنگامِ قیام آتا ہے

دیکھئے رحمتِ کونین نوازیں کیسے

بن کے محتاجِ کرم شوقِ تمام آتا ہے

روح دُھل جاتی ہےروتا ہوں جو یادِ شہؐ میں

اشک جو آنکھ سے گرتا ہے وہ کام آتا ہے

روضۂ پاک پہ پڑھتے ہیں ملائک بھی دُرود

عرشِ اعظم سے بھی دن رات سلام آتا ہے

ساقئ کوثروتسنیم کے میخانے سے

ہر کوئی لغزشِ مستانہ بہ گام آتا ہے

ترجمانِ دلِ یزداں ہے زبانِ محبوبؐ

وحی بن کر لبِ حضرتؐ پہ کلام آتاہے

دیدنی عظمتیں شہرِ شہِؐ لولاک کی ہیں

راہ میں کعبہ سا ذی شان مقام آتا ہے

بعثتِ خواجہؐ ہُوئی بعدِرسولانِؑ کرام

صفیں ہوجائیں مکمل تو امام آتا ہے

ایک میں ہی نہیں گیسوئے محمدؐ کا اسیر

طائرِ سدرہ بھی اُڑ کر تہِ دام آتا ہے

اے دل! اب وقت ہے پیری کا مدینے پہنچیں

آشیانے میں پرندہ سرِ شام آتا ہے

رومیؒ و جامیؒ و سعدیؒ ہی پہ موقوف نہیں

اُن کے مدّاحوں میں مظہر کا بھی نام آتا ہے

شاعر: حافظ مظہرالدین مظہرؒ